BACOLOD CITY – Pinarangalan ang Camarines Norte Electric Cooperative, Inc. (CANORECO) ng iba’t ibang pagkilala mula sa National Electrification Administration (NEA) at Philippine Rural Electric Cooperatives Association (PHILRECA) sa Joint Awarding Ceremony na ginanap noong Agosto 9, 2025 (Sabado) sa SMX Convention Center, Bacolod City.
Ang seremonya ang naging tampok at pangwakas na bahagi ng tatlong-araw na NEA-EC Convergence, na nagsimula noong Agosto 7. Sa unang dalawang araw, tinalakay ang mahahalagang isyu at oportunidad sa sektor ng enerhiya, kabilang ang mga presentasyon at diskusyon hinggil sa mga usapin na may kinalaman sa mga Electric Cooperative (EC).
Dumalo sa nasabing pagtitipon sina NEA Administrator Antonio Mariano C. Almeda, PhilRECA Party-list Representative Presley C. De Jesus, APEC Party-list Representative Sergio C. Dagooc, Department of Energy (DOE) Secretary Sharon S. Garin, ERC Chairperson Atty. Francis Saturnino C. Juan, Department of Education (DepEd) Secretary Atty. Juan Edgardo M. Angara, University of the Philippines (UP) President Atty. Angelo A. Jimenez, House Committee on Legislative Franchises Chairman Jeffrey P. Ferrer (Negros Occidental, 4th District Representative), Motivational Speaker Ferdinand Tan, at iba pang mga panauhin.
Mula sa NEA 2025 Lumens Awards, tinanggap ng CANORECO ang mga sumusunod na parangal:
- EC with Fully Liquidated Subsidy Fund
- Consistent Green EC Award
- Single Digit Feeder Loss Award
- Compact of Cooperation Award
- Top Performing EC Award
Samantala, mula naman sa PhilRECA Awards from the Wires 2025, nakamit ng Kooperatiba ang mga sumusunod na pagkilala:
- Prompt Payor Award
- Strong Commitment to Brotherhood Award
- Gold Stellar Award
- Sustained Improvement Award
- Model Member-EC Award
- Occupational Safety and Health Excellence Award
- The Iron Pillar Award
Ang Top Performing EC Award na natanggap ng Kooperatiba mula sa NEA ay ibinibigay sa mga Electric Cooperatives na nakakuha ng Triple A (“AAA”) Category EC base sa assessment ng kanilang performance noong nakaraang taon (2024). Sinusukat rito ang pinansyal, institusyonal, at tekninal na katayuan ng bawat EC sa bansa. Dito natutukoy ang credit worthiness, level of development, protection, empowerment, at satisfaction ng mga Member-Consumer-Owner (MCO). Mula noong 2016 hanggang sa kasalukuyan, siyam na magkakasunod na taon nang natatanggap ng Kooperatiba ang pinakamataas na pagkilala na ito mula sa NEA.
Ang mga natanggap na parangal ay patunay sa dedikasyon ng CANORECO sa pagbibigay ng maaasahan at maayos na serbisyo sa mga Member-Consumer-Owners (MCO) nito. Inspirasyon rin ito upang patuloy pang pagbubutihin ng Kooperatiba ang mga serbisyo na hatid nito sa mga MCO.